Árið 1837 kom út í Danmörku ævisaga athafnamannsins og frelsishetju Bandaríkjanna Benjamíns Franklíns eftir Jørgen Wilhelm Marckmann. Varð sú bók strax afar vinsæl og einn af þeim sem lásu bókina var frelsishetja okkar Íslendinga Jón Sigurðsson. Þótti honum mikið til bókarinnar koma og hóf strax að þýða hana á íslensku. Var hún svo gefin út af Hinu íslenska bókmenntafélagi tveimur árum síðar árið 1839. Bókin er um margt mjög merkileg. Í fyrsta lagi er gaman að kynna sér ævi þessa merka manns og þá er boðskapur bókarinnar sígildur og á jafn vel við í dag og þegar bókin var skrifuð. Benjamín Franklín var holdgervingur heilbrigðrar hugsunar og bara við það að lesa um manninn er eins og maður eignist hlutdeild í þeim góðu eiginleikum sem prýddu þetta stórmenni. Það sem þó gerir þessa bók ekki síður forvitnilega fyrir okkur Íslendinga er sú staðreynd að þýðingin er unnin af Jóni Sigurðssyni. Flestir þeir textar sem við þekkjum eftir þann mæta mann eru formlegri baráttutextar sem lúta að bættum kjörum okkar Íslendinga. Hér kveður hins vegar við allt annan tón; efnið kallar á léttari stíl og skemmtilegri og það er greinilegt að Jón hefur haft gaman af að fást við þetta verkefni.